Ang aklat na ito ay nasulat sa panahon ng Espiritu Santo. Tahasang mababasa sa aklat na ito ang mga katuruan na mula sa DAKILANG AMA upang tayo ay mabuhay nang naayon sa KANYANG kalooban habang tayo ay nandirito sa lupa.

Setyembre, 2006 ng ako ay bendisyunan ni Apo Conching at siya ay nagpahayag sa akin ng ganito:

"May misyon kang gagampanan, itatala mo ang libro sa panahon ng Espiritu Santo, itatala mo ang buhay ko."

Nang una ay atubili ako at ang sabi ko sa sarili ko ay ito, "paano ko ito maitatala samantalang nang makilala ko si Apo Conching ay ika limang taon na ng kanyang pagmimisyon? Wala akong kamalayan sa mga naganap sa kanyang buhay. Bakit ako? Maraming alagad na nang unang taon pa lamang ng kanyang pagmimisyon ay kasama na niya, bakit hindi ang isa sa kanila?" Naitanong ko ito sa sarili sapagka't nang panahon na iyon ay wala pa akong kamuwangan sa mga hiwaga ng DIYOS ESPIRITU SANTO.

Ang takda ay takda, ang salita ng AMA ay walang pagkabula. Madaling araw ng Abril 12, 2007, nang ako ay may naramdamang kakaiba. Akala ko ay nananaginip ako, binuksan ko ang aking mga mata at dinama ko ang aking kapaligiran, gising pala ang diwa ko. Nadama ko na may parang malaking bilog na nakapalibot sa aking ulo. Kulay pilak ito. Naitanong ko sa aking sarili, ano ito? Bakit pilak ang kulay at bakit nakaikot sa ulo ko? Bago mag ika-anim ng umaga ay bumangon na ako. Naghanda na ako sa aking pagpasok sa paaralan na aking pinaglilingkuran bilang Director.

Habang ako ay naghahanda, bumalik sa isip ko ang kakaibang nadama ko. Parang may nagbubulong sa akin na umpisahan ko na ang pagsulat ng libro. Ang tanong ko pa rin ay paano? Paano ko pasisimulan?

Ibinigay sa akin ang detalye ng ganito:

"Tatlong Yugto ito, hambing sa Diyos AMA, ANAK at ESPIRITU SANTO. Ibibigay KO sa iyo ang bawat kabanata sa unang yugto, saliksikin mo ito. SA PILING NG ESPIRITUNG BANAL ang titulo ng aklat na susulatin mo."

Maging ang oras at lugar ng pagsusulat ay itinakda NIYA. Wika NIYA ay sulatin ko ito sa loob ng dormitoryo. Matapos ang pahayag ni Apo Conching sa gawaing pang-umaga ay pinapanhik na ako, sapagka't sa oras na iyon ay tahimik sa loob ng dormitoryo. Habang magsusulat ako, ang mga kasama ko namang Alagad ay gaganap sa kanilang gampanin sa altar.

Ipinasok din NIYA sa kaisipan ko ang ganito:

"Masdan mo ang larawan KO sa itaas ng dormitoryo ninyo, larawan lang iyon, subali't nandoon ang Espiritu KO na gagabay sa iyo."

Nang araw din na iyon ay sinimulan ko ang pagbabalangkas ng libro ayon sa pagpapahayag sa akin. Tinipon ko ang lahat ng bagay na gagamitin ko. Walang naging balakid sapagka't ang lahat ay inilalatag NIYA sa mga kamay ko.

Tinipon kong lahat ang tapes kung saan nairecord ang lahat ng kanyang pahayag mula sa unag taon ng kanyang pagmimisyon. Pinakinggan ko ang mga ito at isinaayos ko ayon sa paksa at nabuo ko ang ikalawang yugto.

Nag-interbyu rin ako ng mga tao na nakasama ni Apo Conching mula pa sa pasimula. Inalam ko ang mga kaganapan, ang mga hiwaga na kanilang nasaksihan.

English ang titulo ng ikatlong yugto na ipinasok NIYA sa kaisipan ko. Aniya'y "Sharing of Faith" ito na isinatagalog ko. Nabuo ko ang yugtong ito sa pamamagitan ng pagtatanong sa mga taong napagaling ng Panginoong Hesukristo sa pamamagitan ng Apo Conching. Nangalap ako ng mga testimonya. Pinakinggan ko ang mga pahayag ng mga taong gumaling mula sa mga tapes. Kinuha ko ang mga testimonya ng mga kapatid na gumaling mula sa iba't ibang panig ng mundo sa website at nakumpleto ko ang ikatlong yugto.

Pahayag din NIYA ay isama ko lahat ang mga panalangin na itinuro NIYA upang ito ay mapalaganap.

Ang disenyo at kulay ng pabalat ay ibinahagi niya kay kapatid na Marissa. Ipinaguhit niya ito kay Architect Rose Cunanan. Napalundag siya sa tuwa nang makita ang kabuuan, sapagka't ang iginuhit na disenyo ang eksaktong inilarawan sa kanya. Detalyadong ipinahayag pati ang kulay ng papel at kulay ng tintang gagamitin. Maging ang sukat ng aklat ay ipinabatid na dapat ay maaring madala sa lukbutan ng babasa

Ang Disenyo ng Libro: